O Club Baloncesto Arteixo pon a súa app de cupóns a disposición dos establecementos do Arteixo CCA

O comercio local poderá ofrecer ata o mes de setembro os seus descontos na app, reservada habitualmente para os patrocinadores do club.

O Arteixo CCA chegou a un acordo de colaboración co Club Baloncesto Arteixo que permitirá a todos os establecementos asociados acceder de forma gratuíta, ata o próximo mes de setembro, á app de cupóns de desconto da entidade verde e amarela. Habitualmente, esta posibilidade está reservada só a patrocinadores e colaboradores do club, que con esta iniciativa quere demostrar o seu apoio ao tecido comercial de Arteixo.

O acordo será beneficiono tanto para os socios do CB Arteixo, que poderán acceder a novos descontos a través da app, como para as empresas asociadas ao CCA, que contarán cunha nova ferramenta de promoción coa que poderán chegar a un público máis amplo. Cada establecemento poderá poñer os cupóns que desexe a disposición dos usuarios da aplicación, dispoñible para os sistemas operativos Andoid e iOs. Os socios que a descarguen terán a oportunidade intercambiar estes cupóns e aproveitarse de múltiples vantaxes.

A presidenta do Arteixo CCA, Paula Díaz, defende a creación de sinerxias entre sectores tan distintos como o deporte e o comercio para avanzar na volta á normalidade trala pandemia. “Son momentos difíciles para todos”, afirmou, “e agora é máis necesario ca nunca chegar a acordos de colaboración para revitalizar a economía e a vida social da vila”. Pola súa parte, o presidente do CB Arteixo, Francisco Lozano Arenas, agradeceu o compromiso do CCA co deporte local e expresou a súa convicción de que este acordo resultará beneficioso para ambas partes. “O club de baloncesto e o comercio local deben apoiarse mutuamente para fortalecer o seu vínculo coa comunidade”, engadiu.